ឯកឧត្តម សោម ពិសិដ្ឋ អភិបាលខេត្តកែប បានសម្រេចជ្រេីសរេីសភូមិចំនួន០១ភូមិ គឺភូមិចំការបី និងត្រៀមភូមិចំនួន០៣ទៀត ដេីម្បីដាក់អោយអនុវត្តគម្រោងតេជោភូមិ១០០ នៅខេត្តកែប
មានប្រសាសន៍នេះ ក្នុងឱកាសដែល ឯកឧត្តមអភិបាលខេត្ត ទទួលជួបស្វាគមន៍គណប្រតិភូវេទិការសម្ពន្ធសង្គមស៊ីវិល(វសស) នៃទីស្តីការគណរដ្ឋមន្រ្តី ដឹកនាំដោយ ឯកឧត្តម ដួង វីរ័ត្ន នាថ្ងៃទី២៨ ខែតុលា ឆ្នាំ២០២០ នៅសាលាខេត្តកែប ។
ឯកឧត្តម ដួង វីរ័ត្ន បានលេីកឡេីងថា ទីតាំងដែលមានសក្តានុពលសម្រាប់អនុវត្តគម្រោងតេជោភូមិ១០០នេះ ត្រូវមានលក្ខណៈ ជាកេរ្តិ៍តំណែលប្រវត្តិសាស្រ្ត និងវប្បធម៌ ទាក់ទាញភ្ញៀវទេសចរណ៍ អាចទាក់ទាញអ្នកវិនិយោគ មានហេដ្ឋារចនាសម្ពន្ធគ្រប់គ្រាន់ ផ្លូវ សាលារៀន មណ្ឌលសុខភាព និងជាទីតាំងដែកមានទីប្រជុំជន។
គម្រោងអភិវឌ្ឍន៍តេជោភូមិ ១០០ ត្រូវបានប្រមុខរាជរដ្ឋាភិបាលកម្ពុជា ឯកភាពយល់ព្រមកាលពីដើមឆ្នាំ២០១៩ ក្នុងពេលដែលកម្ពុជាធ្វើជាម្ចាស់ផ្ទះ នៃកិច្ចប្រជុំក្រុមប្រឹក្សាវប្បធម៌អាស៊ីដែលមានសមាជិក ៥២ ប្រទេស។ គម្រោងនេះ គឺជាការពង្រឹងការអភិវឌ្ឍ ក្រែប្រែ កែសម្រួល ពង្រីកសក្តានុពលក្នុងមូលដ្ឋាន ដែលយកវប្បធម៌ជាស្នូលក្នុងទិសដៅពង្រីកចំណូលឱ្យប្រជាពលរដ្ឋនៅតាមមូលដ្ឋាន។
ឯកឧត្តម បានវាយតម្លៃថាគម្រោងនេះ គឺជាពង្រឹងនូវសមត្ថភាព និងប្រើប្រាស់សក្តានុពលមូលដ្ឋានឱ្យអស់លទ្ធភាព ហើយក៏ជាខឿនដ៏រឹងម៉ាំសម្រាប់ការគាំទ្រចក្ខុវិស័យរបស់រដ្ឋដើម្បីក្លាយជាប្រទេសមានចំណូលមធ្យមកម្រិតខ្ពស់ និងប្រទេសអ្នកមាននៅឆ្នាំ២០៣០ និងឆ្នាំ២០៥០ ផងដែរ។
ឯកឧត្តម សោម ពិសិដ្ឋ អភិបាលខេត្ត បានបញ្ជាក់បន្ថែមទៀតថា ទីតាំងភូមិចំការបី(តំបន់ភ្នំវល្លិ៍) ជាតំបន់ប្រវត្តិសាស្រ្ត កំពុងប្រែក្លាយជាតំបន់កសិ-ឧស្សាហ៍កម្ម ជាអតីតតំបន់សង្គ្រាម ប៉ុន្តែបច្ចប្បន្ននេះ បានប្រែក្លាយជាតំបន់អភិវឌ្ឍន៍ មានផ្លូវគមនាគមន៍គ្រប់គ្រាន់ ។
ឯកឧត្តមអភិបាលខេត្ត សង្ឃឹមថា គម្រោងនេះ នឹងបង្កើនចំណូលប្រជាជន និងជាគ្រឹះគាំទ្រចក្ខុវិស័យឆ្នាំ ២០៣០ ដោយយកវប្បធម៌ជាស្នូលនៅមូលដ្ឋាន។
