“អរគុណសន្តិភាព” អភិបាលស្រុករំដួល អញ្ជើញចុះសួរសុខទុក្ខប្រជាពលរដ្ឋដែលមកសម្រាកព្យាបាលជំងឺនៅមន្ទីពេទ្យបង្អែកសាមគ្គីរំដួល!
(ខេត្ដស្វាយរៀង)៖ នៅថ្ងៃព្រហស្បតិ៍ ១៣ រោច ខែភទ្របទ ឆ្នាំថោះបញ្ចស័ក ពុទ្ធសករាជ ២៥៦៧ត្រូវនឹងថ្ងៃទី១២ ខែតុលា ឆ្នាំ២០២៣នេះ លោក ហែម សុីណា អភិបាលនៃគណៈអភិបាលស្រុករំដួលបានដឹកនាំក្រុមការងារអញ្ជើញចុះសួរសុខទុក្ខបងប្អូនប្រជាពលរដ្ឋដែលមកសម្រាកព្យាបាលជំងឺនៅមន្ទីពេទ្យបង្អែកសាមគ្គីរំដួល នៅក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ ។
ពិធីនេះមានការចូលរួមពី៖ លោក នៃ សអភិបាលរងស្រុករំដួល លោក វេជ្ជបណ្ឌិត សាន់ សុធាវុធ ប្រធានមន្ទីរពេទ្យបង្អែកសាមគ្គីរំដួល ព្រមទាំងបុគ្គលិកក្រោមឱវាទរបស់មន្ទីរពេទ្យបង្អែកសាមគ្គីរំដួល ផងដែរ។
លោកអភិបាល ក៏បានស្នើរដល់ក្រុមគ្រូពេទ្យសូមផ្តល់ស្នាមញញឹមដល់អ្នកជំងឺនិងព្យាបាលដោយក្រមសីលធម៍និងវិជ្ជាជីវៈ ដោយគ្មានការរើសអើង។
លោកបានថ្លែងនូវការកោតសរសើរចំពោះសកម្មភាពការងារ និងគុណភាពនៃការពិនិត្យព្យាបាលជំងឺរបស់ក្រុមគ្រូពេទ្យ ដែលប្រសិទ្ធនាមថា “ជាកងទ័ពអាវសជួរមុខ” ដែលបានលះបង់កម្លាំងកាយ ចិត្ត ក្នុងការប្រយុទ្ធប្រឆាំងនឹងជំងឺដង្កាត់ផ្សេងៗ និងជំងឺឆ្លងសកលកន្លងមក ដោយគោរពទៅតាមក្រមសីលធម៌វិជ្ជាជីវៈ ដែលក្រុមគ្រូពេទ្យយើងបានដាក់វេនប្រចាំការដើម្បីពិនិត្យសុខភាពប្រជាពលរដ្ឋក៏ដូចជាព្យាបាលជំងឺទូទៅជូនបងប្អូនប្រជាពលរដ្ឋបានយ៉ាងល្អប្រសើរ។
លោកក៏បានមានប្រសាសន៍បន្តទៀតថា មានសុខភាពល្អ អាចធ្វើកិច្ចការងារអ្វីៗបានទាំងអស់ ទាំងសេដ្ឋកិច្ចគ្រួសារនិងសង្គមជាតិ កាលណាសុខភាពយើងទ្រុឌទ្រោមការងារអ្វីគឺត្រូវបាត់បង់ ដូច្នេះការរស់នៅរបស់ប្រជាពលរដ្ឋសព្វថ្ងៃ ត្រូវការកត្តាពីរសំខាន់ៗគឺ សុខភាពផ្លូវចិត្ត និង សុខភាពផ្លូវកាយ ដែលសុខភាពទាំងពីរនេះមិនអាចខ្វះមួយណាបាននោះឡើយ។
ជាមួយគ្នានេះដែរ លោកអភិបាលបានថ្លែងផ្តាំផ្ញើដាស់តឿនដល់ក្រុមគ្រូពេពេទ្យ ត្រូវចេះអភិវឌ្ឍសមត្ថភាព បច្ចេកទេស របស់ខ្លួនឲ្យបានជាប្រចាំ ត្រូវមានសុខភាពល្អមាំមួន មានប្រជាប្រិយភាព ប្រឹងប្រែងធ្វើការងារឲ្យមានប្រសិទ្ធភាពយ៉ាងពិតប្រាកដ គិលានសង្រ្គោះត្រូវត្រៀមប្រតិបត្តិការ និងយាមប្រចាំការ ២៤ម៉ោង/២៤ ម៉ោង។
នៅក្នុងឱកាស ចុះសួរសុខទុក្ខអ្នកជំងឺដែលកំពុងតែព្យាបាលនៅក្នុងមន្ទីរពេទ្យបង្អែកសាមគ្គីរំដួលដោយមានចំនួន 16 គ្រែកំពុងសម្រាកព្យាបាលជំងឺ លោកអភិបាលក៏បានជូនថវិកាក្នុងម្នាក់ចំនួន១ម៉ឺនរៀលផងដែរ និងជូនពរក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ ខែម៉ន់សន់រដូវសូមឱ្យបងប្អូនទាំងអស់សូមឆាប់ជាសះស្បើយពីរោគគាព្យាធិទាំងឡាយនឹងវិលត្រឡប់ទៅផ្ទះសម្បែងដើម្បីប្រកបមុខរបររកស៊ីជីវភាពប្រចាំថ្ងៃ។(សូមអរគុណ)
