រដ្ឋបាលខេត្តកែប រៀបចំទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០១៩
(ខេត្តកែប)៖ នៅព្រឹកថ្ងៃអង្គារ ៨កើត ខែអាសាឍ ឆ្នាំកុរ ឯកស័ក ព ស ២៥៦៣ ត្រូវនឹងថ្ងៃទី០៩ ខែកក្កដា ឆ្នាំ២០១៩ រដ្ឋបាលខេត្តកែប បានរៀបចំទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០១៩ ក្រោមអធិបតីភាព ឯកឧត្តម កែន សត្ថា អភិបាល នៃគណៈអភិបាលខេត្តកែប និងជាប្រធានគណៈកម្មាធិការត្រួតពិនិត្យគ្រឿងខេត្តកែប។
ពិធីនេះក៏មានការអញ្ជើញចូលរួមពីសំណាក់ លោក លោកស្រីជាអភិបាលរងខេត្ត លោក លោកស្រី សមាជិកក្រុមប្រឹក្សាខេត្ត ប្រធានអនុប្រធាន មន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបី សម្ពន្ធយុវជនស្រលាញ់សន្តិភាព ក្រុមកាយរិទ្ធ សហភាពសហព័ន្ធយុវជនកម្ពុជា លោកគ្រូ អ្នកគ្រូ សិស្សានុសិស្សគ្រប់វិទ្យាល័យ-អនុវិទ្យាល័យ។
ក្នុងឱកាសនោះ លោក កែន សត្ថា ប្រធានគណៈកម្មាធិការត្រួតពិនិត្យគ្រឿងញៀនខេត្តកែប បានអានសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដោយមានខ្លឹមសារថា ទិវាអន្តរជាតិប្រយុទ្ធប្រឆាំងគ្រឿងញៀន ត្រូវបានកំណត់និងប្រារព្ធឡើងនៅថ្ងៃទី២៦ ខែមិថុនា ឆ្នាំ២០១៩ ដើម្បីឱ្យយើងប្រយុទ្ធប្រឆាំងគ្រឿងញៀនខុសច្បាប់។
ការប្រារព្ធទិវានេះឡើងពិតជាបានផ្តល់នូវអត្ថប្រយោជន៍ ថែមទាំងមានអត្ថន័យដ៏ជ្រាលជ្រៅដែលបណ្តាសមាជិកទាំងអស់នៅលើសកលលោកតែងតែរៀបចំឡើងជារៀងរាល់ឆ្នាំ ក្រោមប្រធានបទផ្សេងៗដើម្បីធ្វើជាត្រីវិស័យក្នុងការឆ្លើយតបឱ្យបានសមស្របតាមស្ថានភាពជាក់ស្តែងនូវបញ្ហាប្រឈមនានាដែលផ្តើមឡើងដោយសារគ្រឿងញៀន ក៏ដូចជាជួយពញ្ញាក់ស្មារតីដល់ជនគ្រប់រូបឱ្យយកចិត្តទុកដាក់ និងចូលរួមយ៉ាងសកម្មថែមទៀត ក្នុងការបង្កា ទប់ស្កាត់ រាល់ករណីពាក់ព័ន្ធគ្រឿងញៀនខុសច្បាប់។
នៅឆ្នាំ២០១៩នេះការប្រារព្ធទិវាអន្តរជាតិប្រយុទ្ធប្រឆាំងគ្រឿងញៀនត្រូវបានរៀបចំឡើងក្រោមប្រធានបទ”សុខភាពដើម្បីមនុស្សធម៌ មនុស្សធម៌ដើម្បីសុខភាព” ការលើកកម្ពស់ប្រសិទ្ធភាព រួមគ្នាដោះស្រាយផលប៉ះពាល់ បញ្ហាស្មុគស្មាញ ហើយកម្ពុជាបាននិងកំពុងឆ្លើយតបនិងចូលរួមទប់ស្កាត់បានទាន់ពេលវេលា។
ចំពោះប្រធានបទនេះ ពិតជាបានពង្រឹងនូវវិធានការ និងការអនុវត្តច្បាប់ លើកកម្ពស់ជាបន្តបន្ទាប់ប្រកបដោយប្រសិទ្ធភាពខ្ពស់ ដូចជាការព្យាបាល ការស្តានិតិសម្បទារដល់ជនរងគ្រោះដែលជាអ្នកញៀនគ្រឿងញៀន ស្របតាមបទដ្ឋានបច្ចេកទេសដែលជាការទទួលខុសត្រូវជាលក្ខណៈជាតិ អន្តរជាតិ។
ជាមួយនេះយើងក៏មានសេវាព្យាបាលដល់អ្នករងគ្រោះដោយសារគ្រឿងញៀនដោយស្ម័គ្រចិត្ត ដោយផ្អែកលើសហគមន៍នៅតាមគ្រឹះស្ថានសុខាភិបាល។តាមរយៈយន្តការច្បាស់លាស់ដើម្បីដឹកនាំនិងសម្របសម្រួលរាល់បញ្ហាពាក់ព័ន្ធ ប៉ុន្តែការដោះស្រាយបញ្ហាគ្រឿងញៀនឱ្យមានប្រសិទ្ធភាពយើងមិនត្រឹមតែមានកិច្ចសហការល្អជាមួយស្ថាប័ននោះទេ គឺទាមទារចាំបាច់នូវការចូលរួម និងការគាំទ្រគ្រប់មជ្ឈដ្ឋាននៃសង្គម ពិសេសមាតា បិតា អាណាព្យាបាល ដែលជាកម្លាំងដ៏ចាំបាច់ដែលមិនអាចខ្វះបាន៕