ពិធីប្រកាសចូលកាន់មុខតំណែង អភិបាលស្រុករមាសហែក ខេត្តស្វាយរៀង
(ស្វាយរៀង) ៖ នៅថ្ងៃទី០៥ ខែកក្កដា ឆ្នាំ២០១៩នេះ លោក ម៉ែន វិបុល អភិបាលខេត្តស្វាយរៀង បានអញ្ជើញជាអធិបតីក្នុង ពិធីប្រកាសចូលកាន់មុខតំណែងអភិបាល អភិបាលរង នៃគណៈអភិបាលស្រុក និងនាយករដ្ឋបាលសាលាស្រុករមាសហែក និងមានការចូលរួមពីលោក លោកស្រីអភិបាលរងខេត្ត ក្រុមប្រឹក្សាខេត្ត ក្រុមការងារថ្នាក់ជាតិចុះជួយស្រុក លោកនាយករងរដ្ឋបាលសាលាខេត្ត លោកស្នងការរងនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោកមេបញ្ជាការរងតំបន់ប្រតិបត្តិការសឹករងស្វាយរៀង លោកប្រធានមន្ទីរ-អង្គភាព លោកនាយកទីចាត់ការគ្រប់គ្រងធនធានមនុស្សសាលាខេត្ត លោក លោកស្រីជាក្រុមប្រឹក្សាស្រុក គណៈអភិបាលស្រុក មន្ត្រីរាជការសាលាស្រុក ប្រធានការិយាល័យនានាជុំវិញស្រុក មេឃុំ ស្មៀនឃុំ និងនាយប៉ុស្តិ៍នគរបាលរដ្ឋបាលទាំង១៦ឃុំ តំណាងសមាគម អង្គការសង្គមស៊ីវិលដែលកំពុងធ្វើសកម្មភាពក្នុងស្រុកស្វាយជ្រំ កងកម្លាំង និងមន្ត្រីពាក់ព័ន្ធនានា ។
លោក ម៉ែនវិបុល បានកោតសរសើរ និងវាយតម្លៃខ្ពស់ ចំពោះក្រុមប្រឹក្សាស្រុក គណៈអភិបាលស្រុក មន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធ ប្រជាពលរដ្ឋនៅទូទាំងស្រុក ក្រោមការដឹកនាំរបស់លោក ពេញ ជា អតីតអភិបាលស្រុករមាសហែក នាពេលកន្លងមក បានខិតខំប្រឹងប្រែងយកអស់កម្លាំងកាយចិត្ត បំពេញតួនាទីភារកិច្ចប្រកបដោយការសាមគ្គីភាពក្នុងជួរគណៈអភិបាលស្រុក និងមន្ត្រីរាជការទាំងអស់ ធ្វើឲ្យស្រុករបស់ខ្លួន សម្រេចបាននូវលទ្ធផលល្អប្រសើររួមមាន ការអភិវឌ្ឍហេដ្ឋារចនាសម្ព័ន្ធ ការផ្ដល់សេវាសាធារណៈជូនប្រជាពលរដ្ឋ ការថែរក្សាបាននូវសន្តិសុខ សុវត្ថិភាព និងសណ្ដាប់ធ្នាប់សាធារណៈ រួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចសង្គម និងកាត់បន្ថយភាពក្រីក្ររបស់ប្រជាពលរដ្ឋ ។
លោកក៏បានផ្ដាំផ្ញើនូវកិច្ចការសំខាន់ៗមួយចំនួនដូចជាៈ
១- បន្តពង្រឹងការផ្តល់សេវាសាធារណៈជូនប្រជាពលរដ្ឋឱ្យបានល្អប្រសើរ។
២- ពង្រឹងការសាមគ្គីភាព ឯកភាពផ្ទៃក្នុង និងពង្រឹងរបៀបរបបធ្វើការងារ ។
៣- គណៈអភិបាលស្រុក ត្រូវរៀបចំធ្វើការបែងចែកតួនាទី ភារកិច្ច និងការទទួលខុសត្រូវក្នុងជួរគណៈអភិបាលស្រុកឲ្យបានច្បាស់លាស់។
៤- ពង្រឹងការគ្រប់គ្រង និងអភិវឌ្ឍន៍សមត្ថភាពមន្ត្រីរាជការ។
៥- បង្កើនការសហការក្នុងការថែរក្សា ពង្រឹងសន្តិភាព ស្ថិរភាពនយោបាយ សន្តិសុខសណ្ដាប់ធ្នាប់សាធារណៈ ការបង្ការទប់ស្កាត់ និងបង្ក្រាបបទល្មើសនានា ។
៦- ត្រូវយកចិត្តទុកដាក់ក្នុងការគ្រប់គ្រងដីព្រៃ ដីរដ្ឋ និងទប់ស្កាត់ការរំលោភយកដីចំណីផ្លូវសាធារណៈធ្វើអាជីវកម្មផ្សេងៗ។
៧- បង្កើនការរៀបចំសណ្ដាប់ធ្នាប់ របៀបរៀបរយ បរិស្ថាន អនាម័យឲ្យបានល្អនៅក្នុងស្រុក ។
៨- បន្តជំរុញ និងរឹតបន្តឹងការអនុវត្តច្បាប់ចរាចរណ៍ផ្លូវគោកឲ្យបានម៉ឺងម៉ាត់បំផុត។
៩- ត្រូវចុះដោះស្រាយបញ្ហានានា ឆ្លើយតបនឹងសេចក្ដីត្រូវការពិតប្រាកដ និងជាក់ស្ដែងរបស់ប្រជាពលរដ្ឋ ជាពិសេសបញ្ហាទំនាស់ដីធ្លី ។
១០- អាជ្ញាធពាក់ព័ន្ធត្រូវហាមប្រជាជនយើងដាច់ខាត ការជួលដីឲ្យប្រជាជនប្រទេសជិតខាង។
១១- ត្រូវបន្តការពង្រឹងការទប់ស្កាត់ការនាំចូលជ្រូកពីប្រទេសជិតខាងឲ្យបានដាច់ខាត។
១២-គណៈអភិបាលស្រុកត្រូវសិក្សាស្វែងយល់ពីទីតាំងភូមិសាស្ត្រខ្សែបន្ទាត់និងបង្គោលព្រំដែន ដែលស្ថិតនៅក្នុងដែនសមត្ថកិច្ចដឹកនាំ និងគ្រប់គ្រងរបស់ខ្លួនឲ្យបានច្បាស់លាស់។
១៣-រដ្ឋបាលស្រុកត្រូវលើកកម្ពស់ទំនាក់ទំនងលើកិច្ចសហប្រតិបត្តិការនានា ជាមួយស្រុកជាប់ព្រំដែននៃប្រទេសជិតខាងឲ្យបានល្អប្រសើរ។
១៤-រដ្ឋបាលស្រុក ត្រូវគិតគូររៀបចំប្លង់គោលប្រើប្រាស់ដីធ្លីថ្នាក់ស្រុកឲ្យបានច្បាស់លាស់ ដើម្បីអភិវឌ្ឍន៍ស្រុកឲ្យបានសមស្របទៅតាមស្ថានភាព និងសក្ដានុពលរបស់ស្រុក។
សូមបញ្ជាក់ថា: រាជរដ្ឋាភិបាលបានសម្រេចតែងតាំងលោក ស៊ូ ម៉ុល ជាអភិបាល នៃគណៈអភិបាលស្រុករមាសហែក ជំនួសលោក ពេញ ជា ដែលបានស្នើសុំចូលនិវត្តន៍មុនអាយុកំណត់ ។
ជាមួយនេះ ក្រសួងមហាផ្ទៃក៏បានតែងតាំងលោក ស្វាយ សុភាព ជាអភិបាលរងស្រុុក និងលោក ហម ហឿន ជានាយកដ្ឋបាលសាលាស្រុក ៕