សិក្ខាសាលាផ្សព្វផ្សាយស្តីពីបទប្បញ្ញតិ្តពាក់ព័ន្ធការប្រមូលពន្ធប្រថាប់ត្រាចំពោះការផ្ទេរកម្មសិទ្ធិ ឬសិទ្ធកាន់កាប់អចលនទ្រព្យ
(ខេត្តកំពត)៖ នៅព្រឹកថ្ងៃទី ២៥ ខែមេសា ឆ្នាំ២០១៩នេះ លោក ជាវ តាយ អភិបាលនៃគណអភិបាលខេត្តកំពត និងលោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកពន្ធដារ បានអញ្ជើញជាគណៈអធិបតី ក្នុងអង្គសិក្ខាសាលាផ្សព្វផ្សាយស្តីពីបទប្បញ្ញតិ្តពាក់ព័ន្ធការប្រមូលពន្ធប្រថាប់ត្រាចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ នៅសាលមហោស្រពខេត្តកំពត។
លោក អ៊ូច គឹមស៊ាន ប្រធានសាខាពន្ធដារខេត្តកំពតបានឲ្យដឹងថា បច្ចុប្បន្នសាខាពន្ធដារខេត្តបានពង្រឹងការលើកកម្ពស់កិច្ចសហការក្នុងការជំរុញកម្មសិទ្ធិករ ឬអ្នកទទួលសិទ្ធិកាន់កាប់អចលនទ្រព្យ ជាពិសេសចំពោះម្ចាស់អចលនទ្រព្យពុំទាន់ចុះបញ្ជី ដែលបានផ្ទេរសិទ្ធិកាន់កាប់នោះ ធ្វើនៅត្រឹមថ្នាក់ក្រុង/ស្រុក សង្កាត់/ឃុំ ឲ្យមកបង់ពន្ធប្រថាប់ត្រានៅរដ្ឋបាលសារពើពន្ធជាធរមាន។ ក្រៅពីនោះសាខាពន្ធដារខេត្តបានយកចិត្តទុកដាក់ខ្ពស់ ក្នុងការពង្រឹងកិច្ចសហការប្រមូលពន្ធមួយចំនួនទៀត ដែលជាគុណប្រយោជន៍សម្រាប់អភិវឌ្ឍន៍មូលដ្ឋានរដ្ឋបាលថ្នាក់ក្រោមជាតិ ឲ្យអស់សក្តានុពល មានជាអាទិ៍៖ ពន្ធលើដីធ្លីមិនបានប្រើប្រាស់ និងពន្ធលើអចលនទ្រព្យជាដើម។
ក្នុងឱកាសបើកសិក្ខាសាលា លោក ជាវ តាយ អភិបាលខេត្តកំពត បានមានប្រសាសន៍ថាៈ ចំណូលពន្ធដារជាប្រភពចំណូលយ៉ាងសំខាន់របស់រាជរដ្ឋាភិបាលដើម្បីបំពេញនូវតម្រូវការចំណាយរបស់រដ្ឋ”សម្រាប់កិច្ចការពារជាតិ សន្តិសុខ សណ្តាប់ធ្នាប់សង្គម កិច្ចការសង្គមកិច្ច ការអភិវឌ្ឍន៍ជាតិលើគ្រប់វិស័យ ការបើកផ្តល់ប្រាក់បៀវត្សជូនកងកម្លាំងប្រដាប់អាវុធ មន្ត្រីរាជការ គ្រូបង្រៀន”។ល។
ជាមួយគ្នានេះ លោកអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋ អ្នកជាប់ពន្ធទាំងអស់ ចូលរួមគោរពប្រតិបត្តិច្បាប់ បទប្បញ្ញត្តិ និងនីតិវិធីពាក់ព័ន្ធនានាឲ្យបានត្រឹមត្រូវ គ្រប់គ្រាន់ និងឲ្យបានទាន់ពេលវេលា ដើម្បីងាយស្រួលដល់កាតព្វកិច្ចបង់ពន្ធនេះឲ្យកាន់តែមានប្រសិទ្ធភាពខ្ពស់។
សូមជម្រាបថា៖ ក្នុងអង្គសិក្ខាសាលាព្រឹកនេះ ក៏មានការអញ្ចើញចូលរួមពី លោក លោកស្រី ជាក្រុមប្រឹក្សាខេត្ត លោក លោកស្រី ជាអភិបាលរងខេត្ត កងកម្លាំងទាំង៣ប្រភេទ លោក លោកស្រី ប្រធានមន្ទីរជុំវិញខេត្ត លោក លោកស្រី អភិបាលក្រុង ស្រុក លោកគ្រូ អ្នកគ្រូ មន្ត្រីពន្ធដារ មេឃុំ ចៅសង្កាត់ ស្មៀន និងប្រាជាពលរដ្ឋក្នុងក្រុងកំពតសរុបចំនួន ៦២៧នាក់៕