លោក ជាវ តាយ ជួបសំណេះសំណាលជាមួយថ្នាក់ដឹកនាំយុវជនគណបក្សទូទាំងខេត្តកំពត
(ខេត្តកំពត)៖ កាលពីរសៀលថ្ងៃពុធ ៥រោច ខែចេត្រ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី ២៤ ខែ មេសា ឆ្នាំ២០១៩ នៅមន្ទីរគណៈកម្មាធិការគណបក្សប្រជាជនកម្ពុជាខេត្ត លោក ជាវ តាយ អភិបាល នៃគណៈអភិបាលខេត្ត និងជាប្រធានគណៈកម្មាធិការគណបក្សប្រជាជនកម្ពុជាខេត្តកំពត បានជួបសំណេះសំណាលជាមួយថ្នាក់ដឹកនាំយុវជនគណបក្សទូទាំងខេត្ត ដោយមានការអញ្ជើញចូលរួមពីសំណាក់ លោក លោកស្រី ជាសមាជិកអចិន្ត្រៃយ៍គណបក្ស និងសមាជិកគណបក្សខេត្តសរុបប្រមាណ ៦០០ នាក់។
នាឱកាសនេះដែរ លោក ជាវ តាយ ប្រធានគណៈកម្មាធិការគណបក្សខេត្ត បានជម្រាបជូន អំពីសភាពការណ៍នយោបាយថ្មីៗនៅកម្ពុជា ដូចជា ការសម្រេចរបស់គណៈកម្មការអឺរុបលើការចាប់ផ្តើមនីតិវិធីនៃការព្យួរ អ៊ី ប៊ី អេ(E B A) (គ្រប់មុខទំនិញលើកលែង តែអាវុធ) មានការបំភ្លៃព័ត៌មានអំពីការបោះទីតាំងទ័ពបរទេសក្នុងទឹកដីកម្ពុជា បញ្ហានិន្នាការនយោបាយសាកល និងការបំផុសបញ្ហាមួយចំនួនក្នុងប្រទេស ក្នុងគោលបំណងធ្វើឲ្យប៉ះពាល់សតិអារម្មណ៍មហាជន ពិសេសយុវជនទូទាំងប្រទេស ។ ជាមួយគ្នានេះដែរ លោក ជាវ តាយ ក៏បានរម្លឹកដល់ថ្នាក់ដឹកនាំយុវជនគណបក្សខេត្ត ត្រូវយកចិត្តទុកដាក់នូវប្រសាសន៍របស់សម្តេចអគ្គមហាសេនាតីតេជោ ហ៊ុន សែន នាយករដ្ឋមន្ត្រី និងជាប្រធាន គណបក្សដែលបានលើកឡើងថា៖ “ មិនត្រូវយកអធិបតេយ្យភាពរបស់យើង ទៅដោះដូរជាមួយនឹងជំនួយណាមួយឡើយ”
“ ត្រូវរស់ដោយអុកស៊ីសែនខ្លួនឯង ដោយមិនត្រូវពឹងនូវខ្យល់ដែលគេបញ្ចូលឲ្យនោះទេ”
“ ទោះមាន ឬគ្មាន អីុ ប៊ី អេ វាក៏មិនធ្វើឲ្យយើងក្លាយជាអ្នកមានដែរ” ។
ក្នុងឱកាសនេះដែរ លោក ជាវ តាយ ប្រធានគណបក្សខេត្ត បានឧបត្ថម្ភថវិកា ១០.៦៨០.០០០ រៀល ដល់ថ្នាក់ដឹកនាំយុវជនគណបក្សខេត្ត ស្រុក ក្រុង ឃុំ សង្កាត់ ភូមិ សរុបចំនួន ៥៣៤នាក់ផងដែរ៕
