ឯកឧត្តមរដ្ឋមន្ត្រីកសិកម្មនិងសហការីបានអញ្ជើញចុះទៅពិនិត្យចំការទុរ៉េន
បន្ទាប់ពីកម្មវិធីបើកយុទ្ធនាការឃោសនាបោះឆ្នោតក្រុមប្រឹក្សាខេត្ត ក្រុង ស្រុក អាណត្តិទី៣ ឆ្នាំ២០១៩នៅស្នាក់ការបក្សស្រុកត្បូងឃ្មុំឯកឧត្តមរដ្ឋមន្ត្រីកសិកម្មនិងសហការីបានអញ្ជើញចុះទៅពិនិត្យចំការទុរ៉េនរបស់លោក ស៊ីវ ផាន់នី នៅឃុំអារ:ត្នោត ស្រុកស្ទឹងត្រង់ ខេត្តកំពង់ចាម។
នាឱកាសនេះ លោកបានសួរនាំពីសុខទុក្ខបញ្ហាជីវភាពការងារបង្កបង្កើនផលនិងជាពិសេសដំណាំទុរេនដែលកំពុងពេញនិយមនៅលើទីផ្សារនាបច្ចុប្បន្ននេះ។បងស្រីស៊ីវផាន់នីម្ចាស់ចំការបានជម្រាបជូនឯកឧត្តមរដ្ឋមន្ត្រីថាបច្ចុប្បន្នបានដាំទុរេនលើផ្ទៃដី ៤,៥ហត ប្រមូលផលបាន១រដូវចំនួន ១០ត/ហត មានទីផ្សារល្អ តម្លៃបោះដុំ ២ម៉ឺនរៀល/១kg។ ចំពោះទិន្នផលឡើងចុះទៅតាមរដូវ ឆ្នាំនេះដោយសារអាកាសធាតុក្តៅពេកឃើញថាទិន្នផលមានការធ្លាក់ចុះ។
បងស្រីបានបន្ថែមថាភាគច្រើនម្ចាស់ចំការប្រឈមនឹងបញ្ហាអាកាសធាតុ និងឥណទានការប្រាក់ខ្ពស់ ។
ក្តាប់បានពីបញ្ហារបស់ម្ចាស់ចំការ ឯកឧត្តមរដ្ឋមន្ត្រីបានបកស្រាយជូនបងប្អូនម្ចាស់ចំការនូវរឿង ០៤ សំខាន់គឺទី១.ការងារបច្ចេកទេសដាំ បញ្ហាជម្ងឺ និងការប្រមូលផលទុរេន ទី២.នីតិវិធីនៃការនាំចេញកសិផលកម្ពុជាចេញទៅកាន់ទីផ្សារអន្តរជាតិ ទី៣. ការរៀបចំចងក្រងសហគមន៍ផលិតដើម្បីធានាបរិមាណផ្គត់ផ្គង់ គុណភាព និងបង្កើនតម្លៃបន្ថែម ជាពិសេសការអនុវត្តផលិតកម្មកសិកម្មតាមកិច្ចសន្យា និងទី៤. ណែនាំឲ្យប្រធានមន្ទីរកសិកម្ម រុក្ខាប្រមាញ់និងនេសាទខេត្តកំពង់ចាមទាក់ទងជាមួយធនាគារកសិកម្មវៀតណាមដែលធនាគារនេះកំពុងមានកិច្ចសហការជាមួយក្រសួងដើម្បីសិក្សាពីកម្ចីឥណទានដែលមានការប្រាក់ទាបជាងបច្ចុប្បន្ន។
តាមរយ:ឯកឧត្តមរដ្ឋមន្ត្រី បងប្អូនម្ចាស់ចំការសូមសំណូមពរដល់ក្រសួងរ៉ែ និងថាមពលមេត្តាពិនិត្យពិចារណាអនុវត្តអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី អំពីការបញ្ចុះតម្លៃអគ្គីសនី ក្នុងការបូមទឹក ដែលតម្លៃបច្ចុប្បន្នបានប៉ះពាល់ដល់តម្លៃបន្ថែមកសិផលយ៉ាងខ្លាំង ហើយតំបន់នេះមិនទាន់បានអនុវត្តនៅឡើយ ៕